منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .

منتديات النيلوفر السودانية

منتدي شبابي اجتماعي ثقافي سياسي سوداني
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 مسدار كوستي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد ود الشايقية
رئيس المنتدى
رئيس المنتدى
avatar

عدد المساهمات : 333
تاريخ التسجيل : 12/04/2011
الموقع : السعوديه 00 جازان

مُساهمةموضوع: مسدار كوستي   الثلاثاء أبريل 12, 2011 1:30 pm

مسدار كوستي



من مية سنة كانت فلاية وصي
وبعد هادي السنين صبحت عمار بالحي
اتوافدت عربان للنيل تدور الري
شافت اراضيها وعزمت سكون الحي
&&&
الشاطي القريب كانت بداية انسان
وكت جاها الخواجة وقرر فتح دكان
صبح قبلة عرب من كل فج ومكان
واتباهى الوجود بي كوستي في الازمان
&&&
السن مية سنة شابة وجمالا يسر
الاسم الجميل كوستي ومحمية من كل شر
المهنة التجارة او ياخي قولو سفر
لي كافة السودان بي نيلنا او بقطر
&&&
وما بنسى الزراعة فيها الأراضي وفيرة
تشرب مياه النيل وتدينا من خيرا
ناكل وندي الكل والباقي لي طيرا
وشوفو الجمال يا ناس في كوستي وين غيرا
&&&
سكانا يا حلوين من كل جنس ولون
عايشين ومتصافين ما فيهم البيخون
تلقا الشوايقة كتار ومن الجعلتي بطون
والحمدي والحساني زينة رجال الكون
&&&
وشوفو الدناقلة كمان في قلبها الريان
والا المحس والحلفا في الجيرة هم سيان
فلاتتها ونوبيها ضاربين مثل انسان
في عيشتو متسامح وكل عشقو للسودان
&&&
في كوستي حب للخير وانسانا متصافي
فيها الرواح للروح ونسيما كم شافي
بحر ابيض الرقراق من حنها الدافي
مدمن هواها ويوت بديها من مافي
&&&
لوجينا للإحياء واقعات شمال وجنوب
احياء شمال السكة ناسا عزاز وتلوب
مبداها من الشاطي ثم اتجاهنا غروب
الحلة الجديدة وتجي الرعاية دي صوب
&&&
ناسا قدام بالحيل وفي الحسبة هم اسرار
تدخل لبيت الاول تمرق في اخر دار
عايشين حياتهم طيبة من تبو قاموا صغار
شايلين حنان النيل ومن قدرو اخدو أقدار
&&&
ثم الرديف الاشهر في الحي كلامنا كتير
كم قالو عنو وقالو ما انصفوهو الغير
ساكناهو كل قبيلة وكان التمازج خير
بالاختصار يا ناس صبح السودان تصغير
&&&

واحياء جنوب السكة مبداها من السوق
وحي المرابيع جنبو سكن الوظايف الفوق
او هـــــكذا قد كان قـــــــبال بروك النوق
والدنيا تصبح جايطة والراتب اصبح طوق
&&&
ثم الحديد والسكة حيي الربيت فيهو
حيا الغمام الحي الشوق دوام ليهو
انسانو روعة وجد في بالي طاريهو
ملعب صبانا الغر و ما اظني ناسيهو
&&&
والنصر من كركاب سكانو ناس احباب
وكنيسة الأقباط معلم يناطحو سحاب
سبعة وتمانية كمـــــان بحارة او جلاب
ليهـــــــم تحايانا من داخل الالباب
&&&
ما قلنا كل الفيها اصلو الحكاية إشاره
وذكر البيوت والناس عايزلو ياخي شطاره
لكن خلاصة القول لو تفهمو اماره
كوستي الجمال فيها ما ظني يتضارا
&&&
الشي الغريب وعجيب في معالما المشهورة
كل المعالم نــــــاس مـــــا أبنية وصـــــورة
احداثا والتاريخ في قــــــــلوبنا محـــــفورة
ومعظم رجالاتها تلقاهم أســـــــطورة
&&&

في الفول بتلقا تبوري والزين خبير فيهو
واسماكا عند وهبة او بشري جار ليهو
والقهوة عند حامد والناس حواليهو
تحلف تقول الكل غير شــــــك مواليــــهو
&&&
وفي الخير بتلقا تجاني والاحمدين ناسو
ومنيب حبيب الكل العالي احساسو
وظرافة الكشيب في رنة اجراسو
تسمع ادب وفنون وتشرب نخب كاسو
&&&
في كوستي العوالي تلاتة قالولك اختها
عالي السجن واحد والتاني مشفاها
تالت التلاتة مقابر ود أم جبو سماها
هادي العوالي عديل اوعاكا تغشاها
&&&
طفناها كوستي خيال من ذاكرة الايام
حارمانا غربة بعيدة من زهرها البسام
لكن قلوبنا محبة وبنشوفا في الاحلام
وشاغلانا بي ريدا يا كوستي ليكي سلام
&&&
كانت ملامح خاطفة من كوستي والاحباب
عذرا اذا ما القول كان فيهو حاجة تُعاب
لكن عزانا وحيد للقول فتحنا ابواب
ماالقصة قصة ريد من غير شرح واسباب

( محمد ود الشايقية )
الرياض - 27 أغسطس 2009م
الرجوع الى أعلى الصفحة اذهب الى الأسفل
نيلوفر
عضو فعال
عضو فعال


عدد المساهمات : 199
تاريخ التسجيل : 12/04/2011
الموقع : السعوديه 00جازان

مُساهمةموضوع: رد: مسدار كوستي   الثلاثاء أبريل 12, 2011 10:43 pm

كوستي يا مدالبحر00 علمتي ناسا عاشو ريدك ألف عام

الليله جوك كاتلم الغرام

تشكراتي ودالشايقيه
الرجوع الى أعلى الصفحة اذهب الى الأسفل
محمد ود الشايقية
رئيس المنتدى
رئيس المنتدى
avatar

عدد المساهمات : 333
تاريخ التسجيل : 12/04/2011
الموقع : السعوديه 00 جازان

مُساهمةموضوع: رد: مسدار كوستي   الأربعاء أبريل 13, 2011 1:06 am

نيلوفر كتب:
كوستي يا مدالبحر00 علمتي ناسا عاشو ريدك ألف عام

الليله جوك كاتلم الغرام

تشكراتي ودالشايقيه

كوستي عشق مقيم بالوجدان عزيزتي نيلوفر
كم طال الشوق اليها .. اللهم بلغنا رؤية الحبيبة كوستي .. ولا تقبضنا اليك غرباء عنها .

_________________
الرجوع الى أعلى الصفحة اذهب الى الأسفل
 
مسدار كوستي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات النيلوفر السودانية :: المنتديات الادبية :: منتدي الشعر-
انتقل الى: