مسدار عكود وود الشايقية

كان تحدي كبير بيني وبين صديقي عكود وهو همباتي اصيل ( سأقوم بدعوته الى هنا انشاء الله ) وكا ن التحدي حول حماية صديق مشترك نزل في جواري والعكود يريد هجائه والنيل منه .. وقد جرنا التحدي الى مجادعة حامية الوطيس في تابعو معانا :


ود الشايقية لي عكود :

عكــود يا اخــــوي بدراوي هو الفي بالك
ان درت كتلو سدار يا خويــا يوت تتبارك
لكن عليـــــــــك الدية قبال تطفي لي نارك
اكـــــمنو في كوستي وناسـا حاجبين تارك

الدية عشرة قـوافي من الحســـــان مبناها
من كل قافية رباع متعـــــوب عـلى معناها
ان كان قبلت شروطنا واحسنت في مغناها
بدراوي ليكا دماهو مبروك عليك هجــــاها

ود الشايقية للبدراوي :

بدراوي الاصــــم عكود دا ناوي الشينه
وانا قتلو مرحبتين الـبدري ماهو اضينه
فارس للمغارة سـاعة نفوسـنا ضنيــــنه
وهجام للدهم ما بخـاف ضــــرب قربينه


ختيتلو الشروط صــعبات عليهو دروبا
يمكن ينهـدي ويـــــعـرف دروب التوبا
الا الزول دهيــة احذر مكايــــدو وجوبا
وحصيف الرجال الدنيــا حــاذرو غيوبا


عكود طبعا قبل التحدي وفي ليلة واحدة نزل عشرة مرابيع

ديتكم على انا بالدهــــــــــــــــب بقضيها
وقافايتي الرباع ناس كوستي يقدلو فيها
العشرة العلــــــــــــــــي ليك يوت بهديها
وفوقم تاني عشـــــــــــرة هدية لقاضيها



ماني المكشم في البيـــوت قليل الحليلة
وان جيت للفهم سيد راي يساوي قبيلة
يا البدراوي جيتك وين تطـــــــير الليلة
باكر تنعـــــــــــــــقر انت ووراك قبيلة



يا الشايقي الشروط ختيتا باقية صعيبة
وكان ما تنـــــــــقبل خربت ديارنا العيبة
كان جيت للنضـــــــــم امانة ما انا لعيبة
وان جيت للـــسدار فرسان رباع تكعيبا



البدراوي مالك شـــــــــــايفو فاير سمك
قول الروب اخوي بحـــجاك وبحفظ دمك
غير الروب تفوت الخــــــودة تقعد جنبك
نحن عيال عـــــكود نسف الرجال نتنبك



هاك الخامسة من الـــــــعشرة واحسب صاح
فاير سيفي يقطر دمــــــــــــــــــي مابي صفاح
على البدراوي شـــــــــــــــايل حالي ما برتاح
ناكل الدوم وفتت فول وصاحبك ضارب التفاح



وهاك السادسة من العشرة واقعد جنبي
اسدان الخلا بتعــــــــــمل حساب لضربي
وكـــــــت بدراوي لافح توبو قاصد دربي
حرم ان يطــــــير ما بختاهو بقلع سلبي



وهاك السابعة من العـــشرة ودا الفي بالك
متل هادا الكـــــــــــلام انا فيهو ما بتشارك
ابوتي القـــــــــــــــــــبيل قالولي الزم تارك
وان غلبك عديييييل احسن تفوت من دارك



متل التامنة من العاشرة للعالم بواطن الحال
اسيب ام رشرشرا كحــــــــــــلات لا لا محال
عليها ادوبي وانـــــــــــــضم حرفي في رحال
ومن الطيف اقيــــــــــــف لاحولي زي تمثال



جيت للتاسعة من الديــــــــــــــــــة دون تأجيل
ماني الصبرة لاني البدفـــــــــــــــــــعولو اجير
اسوق المية محــــــــــــل ما أميل معاي تميل
تغني الشـــــــمه لامن ود عكود دموعو تسيل



وهاك العاشرة يا الشايقي وكفاك قضينا
دم بدراوي بكــــــرفو الليلة ماني اضينة
كتال بسيفي لا بالدوشـــــــــــكا لا قربينة
انا ود ناس عكود الما ببــــــــــيت بغبينة

وبعد ما سد الدية المطلوبة قال عكود :

ادينا الفروض يا الشايقي وفتــــــحنا دروبا
سلمنا الاسير ازول اوعا الشمس وغروبا
وان كان قلت لا وابيـــــــــــــت تقضي وجوبا
حرم بالدما نشـــــــــــــــبع صقور الحوبة


الزول البصير بعمل حســـــــــاب لجــــــارو
وايفاء العــــــــــــــــــهود يزيدو في مقدارو
يقول حالــي النضم وانــــــتو الفضل تجارو
يا كوستي الجمال خجلتي القمر في مدارو


طبعا انا حرقني جدا كلامه وشلت لي هما تقيل خلاس :

ها ناس العكود ســـاق القوافي قطيــع
حاولت اقتبس ما لقــيتلي واحدة تطيع
من شدة اباهن استعصن على التطبيع
وان ما اتجاوبن الخـوف شرفنا يضيع

لكن طبعا الشايقي مااا هوين فرديت عليهو وقلت :

اوفيت يا العـــــكود والدية سديــــــت مالا
الدر عمــــــها وغالــــــي الجواهـــر خالا
من سمــــح النضم جــات الجمـوع منهالا
وبي ناشطات حروفـك خليت جُملنا كسالا

اياك سيد فهم نضمك عديل ومُواسا
ما سويتو نئ بدورلو تاني عُواسـا
صعبت السدار خليــتو يوت يتقاسا
الا بجيبو خبرك انا للقــوافي قياسا

كت فاكر الشــــروط عليك قاسية منيعة
الا الحق .. لقيـــتك دوام تجيدو صنيعة
حقيت الشكر سويــــت قــــــوافي بديعة
من شدة جمالن خليــت نفوسنا صريعة

البدراوي جارنا وجـــــورانا ما بتهـان
من دونو الهلاك لي كل طويـــل وملان
والبدري في حمانا زولا عظيـــم الشان
ما المتلك بضيمو وانا ليهو عز وامان

مـــن العشـــرة رديـت خمسة شوفن كيف
كـــلاما قاســـي ما بتقدرلو زي حر صيف
لاتحســــد نعم من الله وخليك ديمة عفيف
والضيف في الحِما حرمان يصيبو الحيف

بشـــــوف ابليــــــسك الليـــــلة مشورتو هروب
مـــن العشـــــرة ليك الســــــادسة جاياك صوب
ومن زين الكلام يا خلي بهــــــديلك بقيرة حلوب
تشرب منى صافي القول لا مغشوش ولا معيوب

ان الشــــــورة عندك تارك الــــــــبتكوس
عجيــــــــنك نئ اخيرلك تاني دنقر عوس
الضيف في حماي وهو مطمئن وجـــلوس
في عزة وامان وفي نومو يوت محــروس

وفي التامن بجر النم على المهرة المأصل ساسا
جميل لونا وهـــــــادل فرعها الحالك تميل مياسا
ابوها القال مهر بتي دهب من ســــاقا لي راسـا
بشوفو قليل علي ضامر الحشا العـــــــــزاز ناسا

عكــــــود لا تكتر الحجة وتزيد العوُّا
ان كان صبرة والا اسد مصيرك طوُّا
عندي كتير من المتلك عجـــاجن لوُّا
ما عارفين مصيرهم وايه دليلم سوُّا

بعد العـــــاشرة ان درت الكرم حقيتو غير مظنة
ومن خيـــــر البلد لو درتا اطعــمناك ثمار الجنة
وان درتا السيوف بدمــــاك تتوشح حمار الحنة
وان كذبت الخبر سوف اثار الحروب في وجنا ..