منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .
منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .
منتديات النيلوفر السودانية
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات النيلوفر السودانية

منتدي شبابي اجتماعي ثقافي سياسي سوداني
 
الرئيسيةأحدث الصورالتسجيلدخول

 

 مسدار المرض

اذهب الى الأسفل 
2 مشترك
كاتب الموضوعرسالة
محمد ود الشايقية
رئيس المنتدى
رئيس المنتدى
محمد ود الشايقية


عدد المساهمات : 333
تاريخ التسجيل : 12/04/2011
الموقع : السعوديه 00 جازان

مسدار المرض Empty
مُساهمةموضوع: مسدار المرض   مسدار المرض I_icon_minitimeالثلاثاء أبريل 12, 2011 1:23 pm

هذه المرابيع نظمت في وقت سابق متفرقة
وكانت مناسبتها بعض الالام التي كانت تشكي منها رفيقة دربي
النص :
الليلة الولـيـــف شاكي الالم في جوفو
حارمني الرقــــاد ومنامي عيني تعوفو
شاحد الله الكريم في الحين يأمن خوفو
يرفع عن حبيبي كــــل الوجع وظروفو



من امس العصير جاب المحيميل حسو
كان واهن ضعيف غلبو الالم ما يدسو
يا ربي الكــــــــريم بي ايدك انت تمسو
تزيل ألمو العليهو قبل الرفــاقة يحسو


يا خلان قســـــاي دعــــواتكم انتو مجابا
وليفي الفي القليـــــب اياكم انتو اصحابا
يا ربي الكـــــريم فــي الحين تزيل اتعابا
لا تضوق هي الالم لا نفسي زايدة عذابا


ظنيــــت الوجع ما ياهو زي في بالك
آلاماً كتر ماهـــا الي جات في خيالك
ريسنا الدعـا ,, ويا الله تصـلح حالك
تنفعا بي دعاك وباقيهو يصل انجالك


سوميتا الشـكر موصـول لغــاية بابك
لاتضوقي الالم لا تشوفي في اصحابك
ونيلوفر تطيبي ويصبح دعـاي اسبابك
تبري من الالـــم انتي وفـــداك احبابك


يا بكي السلام وما تضرك انت وجيعة
ولي ايمان دعاك يصبح ستارة منيعة
من شر الالم .. وفعلك بحفظفو صنيعة
وبي شكـرك يكون نظم القوافي بديعة


طبيبة المنتدي انا بشـكي ليك احوالي
وجعات للحبيب حـارقاني في اوصالي
يشكي من البطن الفيهو خـــات امالي
بس رب العــــباد يشفيـهو لـي الغالي


عادل يا جميل جايب دعـــــــــــاك قوافي
لي محبوب قساي وانا ربي ليهو الشافي
تســـــــــــلم من شرور الدنيا ربي يعافي
وليك مني السلام بي كترة دون اسرافي


سلامات يا الرفيق كتـــر دعاويك ليها
حبيبي الفي الفـــؤاد ما ليا تاني شبيها
بعد الم الفــــــــراق زاد العـلي بالفيها
تشكـــي من الالم ربي الكريم يشفيها


لو كان المــــرض ممكــــن نشيلو وكالة
ما كان الحبيــــب في لحظة يشكي محالة
صبري على المرض ممكن اجيبو رجالة
الا على الحبيب دمــــــــع العيون منهالة


امييييين يا فرح و ربي الكريم يشفيها
من عين الحسود وشر الوجع يحميها
نيلوفر تطيب والعــــــــافية تشمل ليها
من هاما الاشم لي عند صباع رجليها


تسلم يا العزيــز والعـــافية تبقى لباسك
وكتر لي دعــاك يا زول رقيق احساسك
لي زولي الجميل زيد في دعاك وقياسك
يمكن بيك تطيب وفي الخير يزيد ميراثك


واااشر البريد وحبـيبو صوتو وحيح
بعد نومو الهني وفراشو دافي مريح
تتقاطر همومو ويصبح فؤادو جريح
وتمسخ دنيتو لااااامن يجيهو نصيح


عجبي من الكلام صِــح الملافظ عافية
طالب للدعــــاء من القلــــوب الوافـية
ولو صعبان عليك رفعة ايديك الصافية
في غيرك كافية دعــــوة حبايب شافية


الهم التقيــــل فـــــــــوق الاله متكول
والمرض الشديــــــــد لابد يوم بيزول
ود ساتي الحبيب الشكر ليك موصول
لا يصيبك مرض لا تنشغل على زول


كيفن بخلي الجرسة وانا همي موقد ناري
موجوع حبيبي شديد وشاغل على افكاري
يا رب يا كريـــــــــــم ذو المنة انت الباري
مرضاً في الحبيب تقطــــــع خبارو وطاري


الاجــــر الكتيــــر ليك يا جبيل التاكا
حاتم يا اميـــروالشكرة في ممشاكا
حبيـــبي الاتوجع كترلي ليهو دعاكا
يشفيهو الاله وبي دموعو ما يتباكا


جارتي الكــــان زمان يا ربي تسلمي لينا
ومن دعوات صلاتك يا الزينة بس زيدينا
يا ربي الكريم من العــــــــــــــــلل تشفينا
تعـــــــــافي لي حبيبي ومن الزلال تسقينا


شاكرين يا حبيب وانشاء الله دعوة مجابا
تبقالك دخر ساعــــــــــــة الحساب وعذابا
ونيلوفر تطيــــــــــب والعافية تبقى شرابا
لا يصيبا الالـــــــــــــــم لا الوجعة تتشكابا


سمسم يا صديـــق ربي الكريم يحجاك
حبيبي الليلة زين والبركة فيهو دعاك
حمدي انا للاله ما بنقدر عليهو جزاك
يحفظك الكريم من فضلو زايدو عطاك


طبيبة المنتدي شاكي الهموم لي سيدي
ما خيب رجاي واهــــب شفاهو وحيدي
بي صادق دعــــــاكم زاد الكرم توحيدي
بشكرو دون عدد وعقب بقولو قصيدي


طبـيــبة المنتدي انا شــوقي بس لللمة
مشتهي للوليف في حضنو انوم انجمة
مــن رباً كريـــم عـــــــايز المراد ينتمة
بازل كل جهــــودي وعقب معلي الهمة


شاكر دون جحود ليك يا الرفاعي بنية
بي صــــادق دعاها خلت نفوسنا هنية
الشفاء اكتمـــل وانا ياختي عاقد النية
اشكر كل صديق جامــــــــلني بي حنية


صبحــان بالشكر يلهج لساني وقلبي
لي رباً كــــــــريم خفف اذاها وغلبي
بي صادق دعاكم رفع الاله لي كربي
ما خيب رجاي ولا كان دعاكم سلبي


سلمك الكريــم مــــــن كل شر وبلية
يا معــراج اخوي الفيهو صدق النية
البلا انكشــــــــــف ما باقية اي ازية
والمحبوبة طابت من كل شر ورزية


سمسم يا جميل يالـــــــزيك اصلاً مافي
تســـــــلم من شــرور الدنيا ربي يعافي
حبيبي الكان عليل ومنام عيونو مجافي
اصبح بي دعـــاك في صحة ربي يكافي


سعيد قلبي الولــوف وفوق الجمال بتملا
يوم ظهـــر الحبيب في الدارة بان واتجلا
قليبي الكان حزين يوم كنتي تشكي العلة
اصبح منتشي وطار فوق السحاب واتعلا


حبيبي الفي الخلـــوق سموها لي ايماني
ريدك في القليب عـــــرفو البعيد والداني
صلاتي على النبي ما تصيبا عين الجاني
جِــــــــــدَيةً وفي الظبا ما ليها شبهاً تاني


سمـــــــندل يا زعيم انا للكــــلام نظــــــامو
من عــــــندي الـــــــرباع مبداهو ثم ختامو
حين رف القـلب وفي السمحة رص كلامو
زي مطر الرشاش الكـــــــــــبا جاب نسامو


قــــــــــالت لك بجيك ومن الرباع بكفيكا
من حـــــــالي النضم قولاً مخصص ليكا
قالت وقولا صح وانا للمــــــــقال بوفيكا
وان ما بان صـــفاك ياني البشيل واديكا


ببداك بالشـــكر والشكــرة ليك ان عاجب
وفـــي اي الزمــن علت العيون الحاجب ؟
لا تقــــــول القلوب فـــي خوفا بحرا لاجب
وتتناسي النفوس في المحنة فعل الواجب


دحين بينا الوعــــد في غير هذا المَنزَل
اقول ليك الـــــرباع من الجميل ومعَزَل
تجيك فيهو المعاني العالية ماهو مبزَل
اكرام للحبيب ما يـــكــون كلامو مزلزل


نيلوفر تقولي وانا لي وعودك قاضي
مابرضا اليقول السمحة قالت فاضي
سمندل فـي الرباع اديتو لقمة قاضي
والتديهو انتي خــلاس كلامك ماضي


البدري اللـــــــــزوم ساعة قسانا ببين
صوتو مع الدعــــــاْْ بالغ ربا الحرمين
اللهي يزيدو فضلك يا بكري قول آمين
وما تصيبك شـــرور لا دنيا لا في دين


شاكرين الكــريم من العــلل نجانا
غادرنا الســقام الكان ببيت جوانا
بي فضــل الدعـــا العافية تترجانا
لاخيب امـلنا لا الكانو بدعو معانا

الرجوع الى أعلى الصفحة اذهب الى الأسفل
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

مسدار المرض Empty
مُساهمةموضوع: رد: مسدار المرض   مسدار المرض I_icon_minitimeالثلاثاء أبريل 12, 2011 10:23 pm

تسلم وعافي الله رفيقة دربك

ويديكم الصحه والعافيه

بالجد مسدار جميل
الرجوع الى أعلى الصفحة اذهب الى الأسفل
محمد ود الشايقية
رئيس المنتدى
رئيس المنتدى
محمد ود الشايقية


عدد المساهمات : 333
تاريخ التسجيل : 12/04/2011
الموقع : السعوديه 00 جازان

مسدار المرض Empty
مُساهمةموضوع: رد: مسدار المرض   مسدار المرض I_icon_minitimeالأربعاء أبريل 13, 2011 1:22 am

نيلوفر كتب:
تسلم وعافي الله رفيقة دربك

ويديكم الصحه والعافيه

بالجد مسدار جميل


تسلمي يا نيلوفر وربنا يديك الصحة والعافية .. يسعدني ان تعجبك هذه المربعات .
الرجوع الى أعلى الصفحة اذهب الى الأسفل
 
مسدار المرض
الرجوع الى أعلى الصفحة 
صفحة 1 من اصل 1
 مواضيع مماثلة
-
» مسدار كوستي
» مسدار عكود وود الشايقية

صلاحيات هذا المنتدى:لاتستطيع الرد على المواضيع في هذا المنتدى
منتديات النيلوفر السودانية :: المنتديات الادبية :: منتدي الشعر-
انتقل الى: