خيمة المسدار

موضوع: خيمة المسدار الخميس أبريل 14, 2011 2:26 am

اخوانا في منتديات النيلوفرالسودانية
هذه المساحة ضل ضحي متمدد فوق جمال سودانا
ويا سلام لما يلبس جمال المنظر جمال الكلمة ببقى الابداع مرباع نفصل فيهو اصلنا
وكرمنا ونفوسنا السمحة .. وفوق عديلنا نسادر الاخوان .. نسأل عنهم .. ونناضمهم ونتفقد احوالهم
نحلم بي بكرة ونرسم صورة للشوق الفتق جوانا حلم اللقيا بي ناساً جميلة وطاعمة .
وحين يبقى الكلام مرباع .. ومسدارا يأصل فينا فن البادية والعربان , ما بنقبل بغير السمح من الكلام المجرتق بي فهم العقول الواعية العارفة شن بتدور .. وما بندور سوى خيرك يا سودان .
اذا تعالوا نجمل ضل الضحى في خيمتنا من الانتاج الخاص

سماحة الزول وكت بالريد يلم اصاحبو في الضحوية
يسالم دا ويضاحك داك وجــــــــوة رويحتو خوة قوية
وايه الدنيا غير ساعات ... مـــــناي اقضيها صافي النية
اقول مسداري حالي كــــلام تكون اوزانو مية المية .

عجبة الشايب قصيب الســــــكر المتجدع
شغلت قلبي خلتني لا اقدر اجيب لا اطقع
السبب المخلي عضم لساني ديما مـــبدع
جوز رمــــــــان مبنت فوق فريع مـتفدع

فارس في الاصل من الشمــــــــال ونخــــيل
وبحر ابيض ربيت .. وشـــــربت صافي همـيل
صياد للشوارد ما بتعصــــاني قــــافية تمـــــيل
بي الإختصار .. شايقياً صميم وحفيد ملوك النيل

الليلة ان بقيتا بخيت وحـــــظي مواتي
في الضل السمح اقعد وســـــط رفقاتي
يداعبني النسيم واهمـــــسلو بي نماتي
واشرب في مهل من الحســان قهواتي

من زمنا قديــــم في قـــلبي شايل ريدو
والقلب البريــد الليــلة داب فوق سيدو
زاد الشوق على شــــهاني لمسة ايدو
وانفاسو العطر وحلوات عيونو وجيدو

الفارس اب دروع بجميل صفاتو الفيهو
ما بخاف ام دمج ساعة اللقا وسكــــليهو
لكنو ايه يعمــــــــل حين الرشا تلاقيهو
غير تسليم قيادو ورهـــن سلاحو لديهو

يا ناس الغــــــرام في قلبي موقد نارو
بين غـــربة وبعاد كاوياني جد اقدارو
وفوق حالي العلي انا همي ناقر طارو
اكتبلو الحروف تروي وتقول اشعارو

من ايديك شربنا القهوة بكــــــــري متنا
وفوق الضل تكيت بالشوق طريتم اهلنا
فاضـــن دمعتين حبســـــــن كتير بهدلنا
قرنن في الحنـك شـرحن عــــذاب ماكنا

من صبحا بدار دجيـــــــــــتا عاني دوامي
والبال اشتغل جفف معيـن إلهــــــــــــامي
تفكير في الاهـــــــــل خارب على نظامي
ودون اشعر لقيت في الضل رفعـت تمامي

لاقيت الفـــرح فوق الضليل طربانا
شدت قهــوتا وطلــقت بخـورو لبانا
قالت يا الرفيق اقعد تعال في حدانا
اشرب قهوتك عــقب السعد بطرانا

يمين الله الســـعد من فد فنيجين هبا
زي مطر الخريف كل المواعين عبا
وبعد بالا كسيف وعقلا مضيع وغبا
اتراوح دوامي وجواي الامل قد شبا

سلام اهل النضـــــــم الما بدورلو شروح
سلام لي كل عضو في ريدتو شرقة روح
سلامي عــلى الـديار وانا جيتا تاني ابوح
ادندن بالنميم و اهديو بلابل الــــــــــدوح

ها ناس الوجع في جوفنا خالف الكية
قدلاتنا القبيل صبحــــت ضهور محنية
الوطــــــن الكبير ايه الى سوا جنية ؟
مليونو الكتير اصبح شـــوايات مية !

مجادعة مع احد الاخوان سوا ( قرقر ) كتير . . . .

الليلة جيتك كية تشفي الجُراب الفيك
ان كان ثبت الويل وان كان جريت بلفيك
الليلة ناوي عليك حد ما تصيح بي فيك
اما الاسر والقيد واما السيوف تشفيك

الزول ان عرف مقـــــدارو تب ما تعلا
على الناس التشوفو بدرالسما الاتجلا
قدرك حبهم لو ضــــــاع دي ياها العلة
شن فايدة عــــــــلاك وكل البحبك ولى

الزول في الســفر برضو العيون شاكيات
وفي نومن خزاز وطول الوكت نايحـات
عينيك والدمــــــوع اتعاهدن في سكات
ما طال البعد هـــــــــن للدموع لازمـات

معليش يا صديــق اصـــــلو الغلط بالغفلة
ورزقي اتا عند كريم ما بجيبو طول السفرة
كان لي اليقين شـن ياخي معنى الجفلة
غير غربة وبعاد وتعيش دوام في حفرة

المــــرباع عجيب يا صاحبي وين ما تختو
قلدات مــــــــن حنان مـــريود قليبك وستو
وساعة الهوش عصا تقرع عوادي البختو
مرباعــك حديثك ســـــــاعة الجـماعة بفتو

مرات الحروف تصبح نصــــال مسنونة
وفي السم الزعاف تلقاها يوت معطونة
دا الجاب الوجع وخلا الرويح ممكنونة
تتمنى الممات تعـــــــــــجل دوام لمنونا

في الليل الطويل سارح برااي بي همي
لازمني السهاد اصبحلي ابويا و عمي
يا عيني متين للنوم اضوق . . تنجمي
وامالي العراض قولي لي هل تنتمي

يا سلافة الفن و لهفة البتمنا
يا هدية من الله , والله بدي الجنة

فرحة البتأمل في لهب إستنا
ورعشة المتشوق وخبة البتهنا

يا فرح يا رقة بيك عمرنا غنا
يا هدية من الله , والله بدي الجنة

زيد عمرنا محنة لينا منها طولة
لملم إنت حزنا بأبتسامة وقولة

ياما قلبنا شال في المحبة ولولة
يا هدية من الله , والله بدي الجنة

قلبي في ترحالو يا ما صيف وشتا
شاف ظلال ألوانو في مداين شتى
لا فرح لا بسمة لما طليت إنتا
وياكا إنتا الإنتا بدهب إتهنا

في الريد والغزل قولو الكـــلام الزين
ما بندور كلام يجــــرح شعور ام زين
الريد يا صحاب ما فيهو حاجة تشـين
ما دام بالادب دايما سياجـــــو متين

سلامات يا ( الرفيق) ووصل تهانيك ليها
جدية وفـــــــــــــــي الظبا انا قلبي تايه فيها
ما زولي الجميل سمـــــــــح الطباع ماليها
تسلم لي دوام ... وما يضوقو نار والديها

لو كان بالمــــــراد والقسمة ملك يميني
ما كـــــــــــــان الفـراق قلل صبر ماليني
ساكن في الفـــؤاد والشوق تملي يجيني
ولي شوفة الخدود بشتاق دوام ود عيني

والله الشوق حراق ...

حاليات الحـــــــروف منظومة في المسدار
وفي الضل والمقيل محســـوبة بالمقدار
ما اصــــــــــــلو القصيد يا خِلا زينة الدار
وسمح قولــــــكم يجيب الزول مع الاسحار

الكل فيك يقول وسمـــــــح الكلام ترديدو
حين بالخير يكون كل زول معلي قصيدو
ادبك يا أم ضـــــمير الناس تزيد تمجيدو
ماهو محــــل خلاف ثابت وعالي نشيدو