منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .
منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .
منتديات النيلوفر السودانية
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات النيلوفر السودانية

منتدي شبابي اجتماعي ثقافي سياسي سوداني
 
الرئيسيةأحدث الصورالتسجيلدخول

 

 حكاية فاطنه السمحه

اذهب الى الأسفل 
2 مشترك
كاتب الموضوعرسالة
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

حكاية فاطنه السمحه Empty
مُساهمةموضوع: حكاية فاطنه السمحه   حكاية فاطنه السمحه I_icon_minitimeالأحد أبريل 17, 2011 9:48 pm



حكاية فاطنة السمحة

الشاعرة/ د:عفاف الصادق حمدالنيل


كم ايام يا بت الزين
تقول هى سنين
كتيرة خلاص
تطول وتطول
واشتاق ليك وافكرفيك
يجينى دعاش سمح بلحيل
شايل لى سماح امى
وحنين امى و يطرينى
صوت امى وكت ما تصيح تنادينى
تعالى ضناى
وجيبى معاك فنجان شاى
واقعدى حداى
تحكينى وتهبش لىّ فى شعرى
وتجر التوب تغطينى
احس بالنسمة هابة على
لامة الدنيا بين إيديا
واقول يايمة حجينى
تقول فرحانة ليك حاج بات
خيراً جانا خيراً جاك
قالوا زمان
في بتاً سمحة عاد بلحيل
عيونها جميلة
زى القمرة فوق النيل
وسبايب راسها متل السيل
طويلة عديلة بس البانة
قط ما ليها تانى مسيل
وزى ما قالوا بتاً واحدة وإيداً لاحقة
وأى انسان داير
فاطنة ليهو عروس
وعاد بى وين ؟
وفاطنة ابوها ما بديها راجلاً شين
وفاطنة اماتا بيضاروها فى العينين
وكان لى فاطنة عم محمول
بسبع بنات
فات فوات عليهن وحول
قالن مرة كان دى الحالة
ما بنرتاح
ما دام ما فاطنة ماسكة الدنيا
ليل وصباح
شبت واحدة
لازم فاطنة بس تنزاح

الرجوع الى أعلى الصفحة اذهب الى الأسفل
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

حكاية فاطنه السمحه Empty
مُساهمةموضوع: رد: حكاية فاطنه السمحه   حكاية فاطنه السمحه I_icon_minitimeالأحد أبريل 17, 2011 9:49 pm


حكاية فاطنة السمحة (2)

وفاتو عديل بوش البيت
يا ابو فاطنة جايين ليك
طلبنا يا عمى ماهو كتير
دايرين فاطنة نمرق بيها
نمشى نسير
قال ابو فاطنة
شورة فاطنة يا بنوتى
عند اماتا
يا أماتا خلن فاطنة تمشى وحاتا
قالت اماتا
شورة فاطنة يا بنوتى
عند اعماما
يا اعماما فاطنة نسوقها بينا امانة
قالوا اعماما
شورة فاطنة عند خيلانا
يا خيلانا دايرين فاطنة
تمشى معانا
عاد ما فاطنة بت محبوبة
واصلوا الشورة عند حبوبة
يا حبوبة جايين ليك
وقولاً خير صباح عينيك
تمرق فاطنة بس ساعات
معانا تسير نجيك صادات
مرقة فاطنة صعبة خلاص
وفاطنة الساس وفاطنة الراس
ومرقة فاطنة بالحراس
وكان دا القول
بشتت ليكن شوال عيش
وواحداً سمسم وأردب فول
كان اتلمى تجنى دغيش
تسوقن فاطنة
وإن ما تلمى عاد معليش
تف تف تف وقعن ليك السبع بنات
يلمن فى الحبوب ساعات
ملن فى لحظة شوالات
وقالت ليهن الحبوبة:
ها بنوت بقيت مغلوبة
سوقن فاطنة
بس غنوا با
عاد يا ستى فرحوا كتير
لا ناموا الليل كبير وصغير
ودغشاً طلّ ليك يالله
مرقن يناغمن
هوى يا فاطنة ارحكى صباح
بتملى دربنا كلو سماح
وجاتن فاطنة ...كدى كدى
جاتن فاطنة لابسة زماما
دارعة الشف تقيل قداما
كاسية حجولا فوق اقداما
داك ياسوار
قصيص سيموتا ورىّ تماما
مرت فاطنة زى قمرة
تضوى سماحة تضوى وسامة
وماشات ليك فى درب طويل
قالت فاطنة:
وعاد ما فاطنة بت العز
تهز وترز
شن قدر قديماتا على المشى
الكتير وطويل
قالت ليهن :
ها بنوت إخير نرتاح تعبنا كتير
اجى يا فاطنةهو نحنا مشينا دابنا متين
قومى ارح هداك النيل
وجنب النيل شافوا نخيل
تمرو جميل
عاد بطلع لو فيكم مين؟
وتأتى الاجابة

الرجوع الى أعلى الصفحة اذهب الى الأسفل
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

حكاية فاطنه السمحه Empty
مُساهمةموضوع: رد: حكاية فاطنه السمحه   حكاية فاطنه السمحه I_icon_minitimeالأحد أبريل 17, 2011 9:50 pm


حكاية فاطنة السمحة (3)

شبت فاطنة انا البطلع
عاد ما ابوى بدورنى ارجع
إن ما خفت شفى يقع
عمى بدقو ما فى وجع
وكان ما خفت خاتمى يطير
خالى بجيبو ما هو كتير
كمان كان خفتّ حجلى يروح
بدقو ابوى وبفدى الروح
وطلعت فاطنة الدهب الاحمر
تشبه قمراً هلّ ونوّر
وصلت فاطنة الشجر العالى
وبين ورتابو تبق وتلالى
وديلك قالن ووب وانارى
وهزت ليك الشجر الاثمر
ونزل التمر الاحمر وأخضر
وشالن هن التمر الطاعم
وختوا لفاطمة التمر الاخضر
ولامن فاطمة شافت الفوق
فرحت وقالت
عاد يا خواتى سمح الذوق
هوى يا فاطنة دربنا عديل
نوصل أهلنا قبل الليل





الرجوع الى أعلى الصفحة اذهب الى الأسفل
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

حكاية فاطنه السمحه Empty
مُساهمةموضوع: رد: حكاية فاطنه السمحه   حكاية فاطنه السمحه I_icon_minitimeالأحد أبريل 17, 2011 9:52 pm


حكاية فاطنة السمحة (4)

وفوق السكة قالت التانية
الما رمت حفلتها
تموت حبوبتها
وهن دسنها رَمَنَ الطين
وشالت فاطنة كل دهباتها
هاك يانيل
قالت التالتة
الما نفضت ريكتها
تموت حبوبتها
ونفضن ليك التمر الأحمر
ونفضت فاطنة
وطع الاخضر
وضحكوا عليها ضحكة شر
قالت الرابعة الما مرقت
حفلتها تموت حبوبتها
ومرقن ليك الدهب الاحمر
وخلن فاطنة تنوح تتحسر
وعرفت فاطنة ضحكوا عليها
ابت ماتمشي
فاضية ايديها
وديلك فرحوا وفاتو خلاص
خلن فاطنة بت الناس
قاعده براها
دون حراس
وقعدت تبكي جنب النيل
ومتل النيل
دموعها تسيل
وهبت ليها هبوباً حمره
قالت فاطنة ووباً لي
قالت ليها
ووباً ليك من الجاييك
وهبت ليها هبوباً خضرة
قالت فاطنة ووباً لي
قالت ليها ووباً ليك
من الجاييك
وهبت ليها هبوباً زرقة
قالت فاطنة ووباً لي
قالت ليها ووباً ليك من الجاييك
وجاها الغول
كبير وسمين
وصرخت فاطنة من الخوف
وضحك الغول
لقيت لى عروس تبرد الجوف
وعرف الغول
وقال لي فاطنة
قول معسول
بطلّع دهبك شف وحجول
وقفلت ليهو فاطنة اضنينو
وسدت ليهو كمان نخرينو
وشرب الغول موية النيل
لامن كملت
وفضل الطين
وجاب لي فاطنة الدهب البلمع
وماهو خمج
من النيل
بس قال ليها
دايرك لي تبقي عروس
وان مادرتي
لحمك مني بملى ضروس
قالت فاطنة اخت ليك
هي ضى عينيك
قام قال ليها
أخواتي مية
قالت فاطنة
اماً ليك
حنينة عليك
قام قال ليها
أماتي مية
دايرك لي
تبقي عروس
وان مادرتي لحمك مني
بملا ضروس
قالت فاطنة
حي رضيت
ووباً لي من دي حالة
فيها بقيت
وشال الغول فاطنة في ضهرو
وقام مشى بيها
مشى مشى بيها
ومشى وداها
لي عند قصرو
وعرسّ فاطنة بت الناس
فاطنة الساس..وفاطنة الراس
وشعرك ليهو سوّ فراش


الرجوع الى أعلى الصفحة اذهب الى الأسفل
نيلوفر
عضو فعال
عضو فعال



عدد المساهمات : 199
تاريخ التسجيل : 12/04/2011
الموقع : السعوديه 00جازان

حكاية فاطنه السمحه Empty
مُساهمةموضوع: رد: حكاية فاطنه السمحه   حكاية فاطنه السمحه I_icon_minitimeالأحد أبريل 17, 2011 9:53 pm


حكاية فاطنة السمحة الأخيرة

ونام الغول
ونومة الغول
عاد ماحول
وقمة الغول
عاد ماحول
وامات فاطنة
يبكوا دهور
وابوات فاطنة
عدموا الزول
وكان فى الحله فارساً اصم
قال اّ فاطنة
ليك ود عم
شال السيف وركب الخيل
وماشي وماشي
فات بو عديل
لاقي عجوز
قالت ليهو
صُد بي دربك ارجِع فوت
درب لي فاطنة
فوقة الموت
قام قال ليها
أفّو أفو
ارجع افوت انا
كيف خيبان
قسمت يمين اخو الأُخوان
لا خواف ولاني جبان
قالت ليهو خير ياجناي
كل الدايرا ليك أقول
نومة الغول
عاد ما حول
قومة الغول
عاد ما حول
وهسة الغول نايم ليهو شهور
قلب الفارس خفّ كتير
دقّ حصانة
قرب يطير
درب للسمحة بمشي بسير
جَد جِد ليك جد ياغول
فراشك من شعر مجدول
ونَفَسك من عطر وبخور
نوم ياغول
نوتك لسة ناقصة شهور
قام بالطول
لاتحزم لمّ لجام جواده
يصول و يجول
حصل فاطنة عند الغول
ناغم ليها قام صاح ليها
هوي يا السمحة
جيتك ازور
أهلك انتي شالوا نذور
زولاً يجيبك من الغول
يبقي عريسا
بيك مسرور
والشعر الليل الكان
متوسد فيهو الغول
قصّاه الفارس
خلى عقابة
وخطف السمحة بيها لي احبابة
وعفش الغول
يبكي ويناغم ليهو يقول
الغول اب نومة سنة
اب قومة سنة
نوارة البيت شالوها
وعاج الغول
نايم ليهو شهور
أما الفارس دق حصانة
حوافره تغني
خطف السمحة
وبقي متهني
وفي دار فاطنة اتلموا الناس
شيوخ الحله
دقوا نحاس
شباب الحله
سووا اعراس
وناس الحله شالوا صباح
كرامات فاطنة
بالتيرن وبالداح
وسط الفرحة
عرس فاطنة
فارس الكر
وملت الفرحة الحلة دهر
وعاشوا سلام
وعاشوا امان
وجابوا اولاد
وجابوا بنات
لُطاف وحُنان
الرجوع الى أعلى الصفحة اذهب الى الأسفل
محمد ود الشايقية
رئيس المنتدى
رئيس المنتدى
محمد ود الشايقية


عدد المساهمات : 333
تاريخ التسجيل : 12/04/2011
الموقع : السعوديه 00 جازان

حكاية فاطنه السمحه Empty
مُساهمةموضوع: رد: حكاية فاطنه السمحه   حكاية فاطنه السمحه I_icon_minitimeالخميس أبريل 21, 2011 3:11 pm

خماسية فاطنة السمحة من اروع ما كتبت الدكتورة عفاف الصادق .. وبما ان فاطنة السمحة هي الوعد المؤجل بيننا .. اتمنى من الله ان يحقق كل آجل ويجعله قرة عينا لنا .. لك كل الحب نيلوفر .
الرجوع الى أعلى الصفحة اذهب الى الأسفل
 
حكاية فاطنه السمحه
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات النيلوفر السودانية :: المنتديات الادبية :: منتدي الشعر-
انتقل الى: