منتديات النيلوفر السودانية
مرحبا بك زائرنا الكريم .. يشرفنا انضمامك إلينا في منتديات النيلوفر السودانية .

منتديات النيلوفر السودانية

منتدي شبابي اجتماعي ثقافي سياسي سوداني
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 ود جبرين والجاكوزي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
نيلوفر
عضو فعال
عضو فعال


عدد المساهمات : 199
تاريخ التسجيل : 12/04/2011
الموقع : السعوديه 00جازان

مُساهمةموضوع: ود جبرين والجاكوزي   الخميس أبريل 21, 2011 9:53 pm

الحبيبين كيفنكم
باقي شغلانية الصحافة دي مرات ترميك في حتات كدي.. أصلها تودر ضُمة ضُمة
شركة جيليت ألت امواس الحلاقة ديك قالت سوتلها منتوج جديد ودايري تعرضه علي الصحفيين
أها يا الحبان قامت سوتلنا رحلة لي مراكش في فندق باقيلي تسعين نجمة..
وصلنا يا الزينين جارين شنطنا...دخلنا الفندق
شويتين جوا الخواويج ديل يعوجوا في الكلام من هني لا هني
والميزات ألت الموس الجديدي وكيفن فيها تلاتة أمواس فِرِد مرة..
ونحن قاعدين مبحلقين عيونا...
انتهوا من نضميهم دة وادونا كل واحد مكنة وقالولنا لامن تدخلوا وتمشوا علي ((الساونا)) ومن بعدها ((الجاكوزي))
استعملوا الامواس دي للتجربة.. وباكر ان شاء الله نوريكم الميزات..
شلت الماكينة ألتي وادوني معاها بشكير كدي علي العراقي وليهو (تِكَة) في نصه كدي يسموهو (الروب)
ومعاهو كريم كدي فشان نحلقبوا..
دخلت يا الحبان علي ساونة السواد دي.. أصلو الحر دة قرب ياخد رويحتي..
وقلت في نفسي: هو الحر دة أتاريهو ياها الساونة
إن بقى كدي سودان الجن اتاريهو ساونة ربانية حقو نبيعا للأوربيين
شويتين يا الحبان دخلت علي النصيبة الاسمها ((الجاكوزي)) دي
غتسوني في حوض يلمع كدي وكله مرايات وادوني جرايد فشان اتسلابن
بقيت اقرأ في الجرايد... شويتين الحوض اتملا موييي
وبقى يبغبغ فوقي علي بغبيغ حَلَة (اللوبي عفن) قبل الآذان بي ساعتين في رمضان
وحاتكم قلعت عيوني علي القعونجي الشايفالا ضبانة ومنتظري تاكلا
وجلدي دة كله اتلبش... والموييي تشيل وتبغبغ فيني
وقلبي بقى يدق علي الواحد وكتين أول مرة داير يقول للجكس: بحبك
وبقيت استغفر واسبح... يا ربي تنجدني..
رفعت رجلي اليمين بي شويي كدي لقيتها بقت تراري
باقيلي نزلت الخبوب الفيها كله من البغبيغ
شويتين اطمأنيت وكتين البغبيغ بقى شويي شويي
وكتين وقف البغبيغ جاني صابونا ورغوة كدي وبقيت اتمشك
واصلها الليفي ناعمي وعاملي زي الجونتي
ماها زي الليف العندنا داك الشكله علي الموز داك وكله تسالي من جوة
اتمشكت زيييييين واخدتلي دش تاني ولقيت نفسي بقيت اراري
وحات الله ان بقيت جيت الامتداد الوكت داك ابوي ما يعرفني في الدرابزين أليلنا
أها دخلت في عراقي الخواجات دة ((الروب)) وشيلتة موس الحلاقي دي ومشيتلي علي حوضا
سمح كدي يمين استخسرت أحلق فوقه.. يمين أن بقيت ملحتلك فوقو قراصي بي ملاحا أحدر خسارة برضو فيهو
يمين وكتين مسحت كريم الحلاقي في احناكي بالله كبسن البرد
وكريم الجن دة اتاريهو يبرد الجلد...
طلعت موس الحلاقي وبديت احلق..
بالله تنزلق في جلدي علي النسوان البيرقصن في الجليد ديلك..
واصلك لا تنفخ جضمك لا تطبزبي لسانك الحتات المطفقة فشان يتحلقن زين
موس الجن دي اتاريها تتعوج في الجلد دة تعدمه الشعرايي
وحاتكم وكتين غسلت وشي وهبشت احناكي.. لقيتن ناعمااااااااااااااااات علي جضوم أليسا
وبقيت اشوف في وشي في المراية وحسيت اني بقيت من عُلي القوم..
وجاتني الهاشميي مع النعوميي دي وافتكرن نفسي وائل كفوري
لا تاني قلت بشبه نادال أليل التنس ولا راموس مدافع ريال مدريد
وقمت قلعت ((التِكِيي)) الفي ((الروب)) قلت اربط راسي مِتِلُم
شويتين رجعت لي طبيعتي وقلت: ايي تربط شنو يا ود جبيرين وانت الشعر بقى محاذي الاضنين علي حيطة الجالوص الماها تامي
ونص الراس دلجة علي مدرج الطيارات..
اها يا الحبان قمت استغفرت.. واتذكرت الامتداد.. ومعاهو موس الحلاقة الاسمها التمساح ديك
والمكنة ألتها العاملي زي راس الكنش وتتفتح من فوق دي
قعدتلي في كرسي في وسط الحمام واتذكرن وكتين اكون داير احلق في بيتنا
تجيب مكنة التمساح دي وتشوفلك قِلْمَة مراييي من مراية الدولابت الاتكسرت
وتجي تتكلها في بنبر جنب ماسورة الحوش وتقعد تنفخ في جضومك فشان الموس ما تجرحك وتحلق كويس
وتلزلز بي لسانك البُكنات المطفقي من حنكك وتمشي الموس فيها
ولامن تنتهي تلقى وشك كله ينقط دم من حلاقة الجن دي
وركبيك يموتن كله كله من صنقير الحلاقي ام دق دي
ومن غير ما احس لقيت نفسي بقول بي صوت عالي: قادر الله علمه واسع


الرجوع الى أعلى الصفحة اذهب الى الأسفل
 
ود جبرين والجاكوزي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات النيلوفر السودانية :: المنتديات الادبية :: منتدي القصة والخواطر-
انتقل الى: