سلام عليكم يا الحبيبين، زارنا في المغرب الشاعر الشحمان وكلماته غُلاد وتريانة التجاني حاج موسى، المهم يا جماعة الخير ناس السفارة نادونا وقالولنا الزول عايز يشوفنا ويناضمنا ونناضموا، العندو جلابيتا جديدة ومركوب دخل فوقوا ومشينا نتخوجج، والنصيحة لي الله الزول دفَقلُوا جنس شعر أحلى من الرُطب، هو يسوي في شعرو ونحن ونعضعض في لِسناتنا، كلامو سمح بالحيل والناس كلها قهَتْ وباين عليهم ناس المغرب كلهم راقدين خًل والشواكيش كاتلاهم عِلِي صابرين، المهم بعد الكلام المتمسح دا الزول قال القصة كلها كانت شاكوش في الجامعة، أفو....، الكلام النضيف دا كلو من شاكوش واحد، يعني الزول دا إن بقا أخدلوا تلاتة شواكيش كان عمر الشاعر لي الليلة يلحن وزيدان ابراهيم يصدح.
يعني الغنا السمح دا كلو من الشواكيش، أتاريه سيف الدين الدسوقي دا لمن قال:
مافي حتى رسالة واحدة بيها أتصبر شوية
والوعد بيناتنا إنك كل يوم تكتب إلي
هل يجوز والغربة حارة وبالخطاب تبخل علي
لم آخر مرة شفتك قبل ما أودع وأغادر
كنت حاسس إني خايف أني متردد وحاير
داير أتصبر أمامك داير أضحك وماني قادر
بس دموعك لم فاضت ضيعت صبري الشوية
وصحت موعدنا الرسائل وين رسايلك وين خطاباتك إلى
صرت بعدك يا حبيبي ذرة في بحر الزمن
بعت للآلام مواهبي وبعتها بأبخس تمن
وحشة ما بتعرف رسايل وغربة عن أرض الوطن
وبس أمل واحد بعيشو لو رسالة تصل إلي
بيها أطمن عليكم وتنقذ الموقف شوية
من خطابي أظن عرفت إيه مكانتك في فؤادي
إنت يا فجر المحبة تستحق شوقي وسهادي
إنت صورة ماضي أبيض ولوحة بتمثل بلادي
بس حرام تبخل علي
وتنسى ما ترسل هدية
حتى لو كلمة أحبك في خطاب مسرع إلي
ووووب وووووبين علينا يا الرجال، دحين النضم الزي المنقي دا كلو من الشواكيش، الله يرحمك يا الجابري إن بقا ما سيف الدسوقي اتعصر في غربتو ديك وين كان نشوف زي دا، ولا صلاح ابن البادية كان ما الضغط الشديد دا وين كنا نسمع:
إنت لو داير بكايا ألف أهلا يا دموع
مهما ألقى النار في قربك برضي أشتاق للرجوع
أنا أصلي عايش كل منايا ألقى في حبك مصير
أنسى في عينيك شقايا وأنسى تعذيب الضمير
عفيت منكن يا بنات حواء، أماني ما نجضتِنَنا نجاض.
دا الكلام إنعل أبو الكمونية ذاتها.
تليشة:
الحب كاروشة في القلب لا يمكن حكها
موضوع: الحب كاروشه في القلب لابمكن حكها00طارق جبريل 
الخميس أبريل 21, 2011 10:12 pm