خيمة المسدار

حبيبي الفي القليب لا فيهو شك لا ريبة
إن كانت معاي او في الغياب هي حبيبة
وان فاتت قــــريب وكشفت عليا سبيبا
ألحقو يا الرفاق ابو فاطنة اظن مو طيبة

حبيبي الفى الضمير بي خفة هادل ديسا
بى طيبها اليفوح يشبه عطور بلقيسا
شمس الضحوة نورك و حار عليا مسيسا
ادتني السهر وصبحت عــيوني طميسا

لاموني في ريدك وانا قلبي بيك ممكون
والما بعرفو غلاك يا ستي زول مجنون
الــدنيا خـــــــربانة لو عزك انتي يهون
قطع الرقـــــاب دونو والدم بيملا الكون

موضوع: رد: خيمة المسدار الأحد أبريل 17, 2011 4:56 am

سـودانية نحــنا والعــمة ياها لباسنا
ناسا في الاصـل دايما مغرق ساسنا
ما بشيلنا الهوا ودوام لبسنا مقاسنا
والبتعدا حــدو لابد بتقطــــــعو فاسنا

يا صاحبي الرفيق اقعـــــــد اقولك نمة
فيها كلام حكيم واسرار لباس العمة
الزول ان سِعد وخلاس مرادو انتمة
تبقالو العـِــميمة عنوان وتاج للهمة

موضوع: رد: خيمة المسدار الأحد أبريل 17, 2011 5:59 am

قعدت بي مهل وفي الجلــــــــسة دار فنجانها
سقت الحبيب بكري وخلت نصيب لي اخوانها
اشهدوا يالخلـــــــــوق انا ريدي كلو عشانها
وقلبي من الوجيب اصبح ضــــــــرب جبخانه

موضوع: رد: خيمة المسدار الأحد أبريل 17, 2011 6:01 am

الجبنة البي مزاج ساواها سمحة نية
قــــــــهوة مدنكلة واللمة هادية هنية
ترياق هم سنين وتصبح aنفوسنا رضية
الحقو يا الرفاق فنجانها مالو تنية

موضوع: رد: خيمة المسدار الأحد أبريل 17, 2011 6:04 am

من صبح الصباح جيت الضليل متمني
اقابل للرفاق وبي فرحـــة اسالم اهني
لقيت الضل خلا ما فيهو زول واظني
بقعد باقي يومي براااي ادوبي واغني

موضوع: رد: خيمة المسدار الأحد أبريل 17, 2011 6:10 am

الشوق ليك بحر .. صعب الوصول لي حدو
ودربا بجيبني عليك ما فيش عزول بيسدو
بي عمري انا بفداك وانا قولي صادق جَدو
وان كمل العمر .. ريدك عمــــــــر لي ودو

موضوع: رد: خيمة المسدار الأحد أبريل 17, 2011 7:13 am

قول لي يا الرفيق وينك غيــابك طال
من شوفتك زمن ومشغول عليــك البال
فاقدك في النميم وكتف المسادير مال
لا تطول الغيبة وقول ليا كيــف الحال

موضوع: رد: خيمة المسدار الأحد أبريل 17, 2011 7:43 am

اخوك مطر السما والجود دوام باريهو
وغير فحــــلا كريم يا فرحة لا تباريهو
الجـــــود والكرم عطيــــــة من باريهو
وبالركبان حباب خيرا يــــزور راجيهو

موضوع: رد: خيمة المسدار الأحد أبريل 17, 2011 7:55 am

الزول السمـــح وكتين يشوف الهنة
يغفر للمسئ ويطلب ظـــــــلال الجنة
لو غلط الصديق في ظني من السنة
تلقالو العذر وتزيــــــدو ياخي محنة

موضوع: رد: خيمة المسدار الأحد أبريل 17, 2011 6:17 pm

ألبارح بشوف طيفا ســــرق نوم عيني
زارني وكان سريع زود عـــــلى انيني
قت ليهو الصبر كيف للسهاد تهديني ؟؟
قال لي يا مريد كل ما اصــــابك فيني

موضوع: رد: خيمة المسدار الأحد أبريل 17, 2011 8:57 pm

الخــــرف ان حصل ما تلوموا غير الغربة
في قلبي الحــــزين غازاها كميـــــن حربة
زايدة الهموم اضعاف بالحيل على منكربة
لازمني الشـــــــــجن خلا النفوس منخربة

موضوع: رد: خيمة المسدار الأحد أبريل 17, 2011 8:59 pm

جيت من الصباح قـــــاعد وحارس الباب
يمكن يجــــــود ربي ويطلوا ناس احــباب
ويســـــعدني يوم حـــظي وتتبدل الاسباب
بعد السواد يصبح ... اللون جميل خلاب

سلامات (يالرفيق) واشواقي مطر العينة
للنمات معاك والقافية سمــــــــحة رزينة
خبارك (يالرفيق) والدنيا مــــــــــالا علينا
كل ما نكون قــــــــــراب نلقاها بعدت بينا

حبابك يا البينة القــــــولا خاتي الهنة
وحاتك يام ضمير انا حتى يوت بتمنى
لمة مع الرفـــــاق وتحت ضليل الحنة
نشــرب جبنة الود فنجانا بكري متنى

معاكم يا الرفاق والخوة ضالة قلبي
بكرف شذاكم يوت وانحلا عاد من غلبي
سجع البلابل يوت في اللمة غير متخبي
ومن السماح الفيكم يا خلي بغرف اعبي

صباحكم زي وهــــــج من الشمس متدلي
وبالاشــــــواق موشح يوصلكم انتو تملي
زايد في ســــــلامكم يمـــكن عسى ولعلي
العين تطول شوفتكم والفرحة تملا الحِلِي

مااا احــــلى النميم وكتيـــن نجر نماتنا
فيها تبين صــفاتنا السمــــحة من ابوتنا
خلـونا الننم نفـــــــــــــرح لروحنا وذاتنا
بيها حبيبنا مرضي وعـدونا هاب وقعاتنا

الجبنات في الضليل والناس كتير ملموما
بي ونســة وضحك والنفس ناسية هموما
لا غل لا حسد سائلين صحـــــــابنا علوما
متباشــــــــــــــرين دوام نيتنا زاملة قوما

الـزول التريدو قول ليهو مما يحب
قلبو يميل عليك تلقاهو ديمة يشب
لا تخـلي المـزاح يتقل على البتحب
يبعد عنك انت وتلقــاهو ليكا يسب

فوق ضل الضحا قرفصتا مشغول بالي
ياتا من الحسان الليـلة قهــــــوتا فالي
ما قايل الظروف تخدمــــــني يا زمالي
من البن الظريف تسقيني (نيلو ) توالي

سوت قهـــوتنا وجلســـــت قُبالنا اديبة
توانسنا بوداد لا فيـــهو شــــك لا ريبة
مزيونة البنات الفـــــــي طباعا الطيبة
ربي يزيد عُـلاك يا الما بتسوي العيبة